MANGGAGAWA LABAN SA DIKTADURA, KORAPSYON AT DINASTIYA!

 

Sa bisperas ng paggunita sa ika-54 na anibersaryo ng deklarasyon ng Martial Law, lalahok ang Partido Manggagawa (PM) sa Lakbay Pananagutan ng People’s Assembly sa ibat-ibang institusyon tulad ng Batasan, Korte Suprema, at Edsa Shrine ngayong Setyembre 20 upang igiit na ang laban kontra diktadura ay hindi lamang pag-alala sa nakaraan—ito ay laban din sa mga anyo ng pang-aabuso sa kapangyarihan na nararanasan ng manggagawa sa kasalukuyan.

 

“Manggagawa laban sa diktadura, korapsyon at dinastiya!” ang paninindigan at panawagan ng PM.

 

“Ang Martial Law ay hindi dapat maging simpleng history lesson na inaalala tuwing Setyembre. Para sa manggagawa, may malinaw itong aral: kapag concentrated ang political at economic power sa iilan at mahina ang democratic institutions at organized labor, madaling maabuso ang kapangyarihan,” pahayag ni PM Chairperson Renato Magtubo.

 

Kasabay nito, bibigyang-diin ng PM sa Lakbay Pananagutan ang dalawang partikular na panawagan: “Trabahong endo at mababang sweldo ay diktadura sa manggagawa!” at “Paghadlang sa unyonismo, diktadura sa manggagawa!”

 

Ayon sa grupo, ginagamit nito ang salitang “diktadura” sa mga panawagang ito upang idiin ang kawalan ng tunay na bargaining power ng maraming manggagawa kapag insecure ang trabaho, kulang ang sahod, at nahahadlangan ang kanilang karapatang mag-organisa.

 

“Demokrasya cannot stop at the ballot box. Dapat may demokrasya rin sa workplace. Kung takot kang mawalan ng trabaho dahil contractual ka, kung kulang ang sweldo para mabuhay nang disente, o kung ang pag-uunyon ay sinasagkaan, napakaliit ng kapangyarihan ng manggagawa sa mga desisyong direktang nakakaapekto sa kanyang buhay,” ani Magtubo.

 

Para sa PM, magkaugnay ang laban kontra political dynasties at korapsyon at ang pagsusulong ng workers’ rights. Kapwa nakasentro ang mga usaping ito sa tanong kung sino ang may kapangyarihan, sino ang may boses, at sino ang nananagot.

 

“Never Again should therefore mean more than never again to Martial Law. It should also mean never again to the concentration and abuse of power, never again to attacks on democratic rights, and never again to a system where workers remain powerless despite creating the country’s wealth,” dagdag ni Magtubo.

 

Sa paggunita ng Setyembre 21, nananawagan ang PM na gawing buhay na bahagi ng pagtatanggol sa demokrasya ang regular at disenteng trabaho, living wage, malayang pag-uunyon at collective bargaining, pananagutan sa korapsyon, at mas malawak na partisipasyon ng mamamayan sa pamamahala.

 

“54 years after Martial Law, malinaw ang hamon: huwag hayaang bumalik ang awtoritaryanismo sa pulitika—at huwag hayaang manatili ang kawalan ng boses at kapangyarihan ng manggagawa sa lugar-paggawa. Manggagawa laban sa diktadura, korapsyon at dinastiya!”

PRESS RELEASE

20 September 2026