𝙋𝙖𝙡𝙖𝙮𝙖𝙞𝙣 𝙖𝙣𝙜 𝙢𝙜𝙖 𝙞𝙣𝙖𝙧𝙚𝙨𝙩𝙤 𝙨𝙖 𝙈𝙚𝙣𝙙𝙞𝙤𝙡𝙖, 𝙆𝙖𝙨𝙖𝙢𝙖 𝙣𝙖𝙩𝙞𝙣 𝙨𝙞𝙡𝙖 𝙨𝙖 𝙥𝙧𝙤𝙩𝙚𝙨𝙩𝙖 𝙠𝙤𝙣𝙩𝙧𝙖 𝙠𝙖𝙩𝙞𝙬𝙖𝙡𝙞𝙖𝙣!

𝙋𝙖𝙡𝙖𝙮𝙖𝙞𝙣 𝙖𝙣𝙜 𝙢𝙜𝙖 𝙞𝙣𝙖𝙧𝙚𝙨𝙩𝙤 𝙨𝙖 𝙈𝙚𝙣𝙙𝙞𝙤𝙡𝙖,

𝙆𝙖𝙨𝙖𝙢𝙖 𝙣𝙖𝙩𝙞𝙣 𝙨𝙞𝙡𝙖 𝙨𝙖 𝙥𝙧𝙤𝙩𝙚𝙨𝙩𝙖 𝙠𝙤𝙣𝙩𝙧𝙖 𝙠𝙖𝙩𝙞𝙬𝙖𝙡𝙞𝙖𝙣!

 

Hindi simpleng kaguluhan ang naganap sa Mendiola kahapon. Ang galit ng kabataan at mamamayan ay lehitimong tugon sa dekada-dekadang pang-aapi at pangungurakot ng estado at ng mga kapitalista. Ang kanilang tapang at porma ng protesta, gaano man katindi o kaiba sa ating nakasanayan, ay bunga ng masidhing kahirapan, ng tokhang na kumitil sa libo-libong buhay, ng mga demolisyon at pagpapalayas, at ng sistematikong pagnanakaw sa kaban ng bayan.

 

Ngunit ang tugon ng gobyerno ay karahasan din: mahigit 200 bayolenteng inaresto, ang ilan pa ay binugbog, pinagpapalo, kabilang ang mga kabataan, habang binabansagan silang "kriminal", "rioters", "adik", sa halip na unawain ang kanilang panawagan. Muli, pinili at pipiliin ng estado ang represyon kaysa sa pagtugon sa mga ugat ng galit at pagkilos.

 

Kinukondena namin ang brutalidad ng pulisya. Dapat palayain ang lahat ng inaresto at tiyakin ang kanilang karapatan sa legal at medikal na suporta. Ang kanilang laban ay hindi hiwalay sa laban ng bawat manggagawa’t maralita na araw-araw inaapi at pinagsasamantalahan sa ilalim ng sistemang ito.

 

Ipinapaalala ng Mendiola na hindi indibidwal na kabataan lamang ang galit kundi buong sambayanang matagal nang tinatalikuran ng gobyerno. Hangga’t nananatili ang kapangyarihan sa kamay ng iilang mayayaman at dinastiya, mananatiling mitsa ang galit ng masa.

 

Patuloy kaming naninindigan sa ipinaglalaban ng mga kabataan, manggagawa, at maralita laban sa kahirapan at korapsyon! Repormang pampultika at panlipunan na babaklas sa dominasyon ng mga pulitiko at kapitalista ang sagot sa problema ng katiwalian at kahirapan.