Hindi lang korapsyon ang
dapat mawala kundi ang sistemang nagsilang nito - ang political dynasty at
patronage politics.
Ang pagwaksi sa korapsyon at
dinastiya ang tampok na isyu ng manggagawa sa martsa patungong People Power
Monument sa ika-162 Araw ni Gat Andres Bonifacio sa Nobyembre 30, kasabay ng
mga kahilingan sa dagdag sweldo at pagtigil sa endo.
Kalahok din ang Partido
Manggagawa sa marami pang magaganap na protesta sa iba’t-ibang panig ng bansa
sa pangunguna ng Trillion People March Movement.
Kung nagawa ng mga korap na
pulitiko na magnakaw ng trilyones sa kabang bayan, ito ay dahil pakiramdam
nila, sila ay hindi mababaling kapangyarihan para lokohin ang taumbayan at
magkamal ng yaman mula sa mga proyekto ng pamahalaan. Ito ay dahil alam nila na
sila-sila lang na mga dynasty ang naghahati sa kapangyarihang mula nasyunal
hanggang lokal.
Ang resulta: Korapsyon ang
naging regular, habang manggagawa ay kontraktwal. Dagdag sahod ang kinontrol,
habang pondong galing sa buwis natin ay bumaha sa bulsa ng mga korap.
Sa manggagawa ay P500 na
noche buena, sa mga korap ay luxury cars, air assets, ari-arian sa abroad, at
male-maletang pera.
Dahil sa korapsyon,
pampublikong serbisyo tulad ng Philhealth at edukasyon ng kabataan ay
nabawasan, programang pabahay ay palpak, mga magsasaka ay iniwang patay-gutom.
Dahil sa dinastiya at mga
korap na opisyal, mga proyekto ay pinaghati-hatian ng magkakamag-anak at
kaibigan, kasabwat ang mga sindikato sa buong pamahalaan. Kulungan ang tama
nilang lugar.
Ang sistemang ito ay dapat
repormahin! Manggagawa ang gawing regular, hindi ang korapsyon! Legislated wage
hike sa manggagawa, hindi legislated kickback sa mga korap!
Dinastiya ang dapat ma-endo,
hindi ang manggagawa! Kalayaan at demokrasya, hindi forever na paghahari ng mga
dinastiya! ###
————-
Detalye ng Bonifacio Day
march ng mga manggagawa.
1. 7:00 AM Nagkaisa Labor
Coalition assembly sa Petron Edsa-Connecticut.
2. Mula dito ay magmamartsa
patungong People Power Monument para sa Labor Program na unang bahagi ng
Trillion Peso March Movement sa buong araw na programa nito.
3. Kalahok din ang PM sa mga
rali sa Pangasinan, Iloilo, Bacolod, Cebu, iligan, Agusan, Davao, General
Santos, at Zamboanga.
———————-
No comments:
Post a Comment