LIGTAS NA PABAHAY HILING SA NHA NG MGA NAKATIRA SA DANGER ZONES SA BULACAN

 

Lumusob ang may 100 pamilya sa tanggapan ng National Housing Authority sa San Jose Del Monte Bulacan upang hilingin sa ahensya na ipagkaloob na ang matagal na nilang hinihintay na pabahay sa mga katulad nilang naninirahan sa tinatawag na danger zone o mga lugar na hindi ligtas sa pinsala ng mga sakuna katulad ng pangpang ng ilog o mabababang lugar na madalas binabaha.

 

Nais ng mga ito na muling makipagdayologo sa mga opisyal ng NHA sa rehiyon upang alamin ang mga hakbang na gagawin matapos ang ilang taong pag-uusap tungkol sa kanilang kahilingan. Ang grupo ay kinabibilangan ng mga kasapi ng Partido Manggagawa (PM) at Alyansa ng Maralitang Pilino (AMP).

 

Ayon Kay Ver Estorosas, Pangulo ng PM at lider din ng AMP, 2017 pa umano nagkaroon ng mga dayologo sa kanilang kahilingan subalit hanggang ngayon ay wala pa umanong linaw mga hakbang para sa kanilang paglilipatan.

 

“Umabot na nga ang aming pakikipag-usap hindi lamang sa NHA kundi sa Kapitolyo at Senado. Sa katunayan ay may mga ilang nailatag nang resolusyon na napag-usapan kaharap si former Gov. Willy Alvardo ng Bulacan at noo’y Housing Committee Chair ng Senado na si Sen. JV Ejercito,” pahayag ni Estorosas, subalit wala umanong iniuusad sa antas ng NHA kung kaya’t idinadaan nila itong muli sa protesta.

 

Darating na naman aniya ang tag-ulan at panahon ng bagyo at mahaharap na naman sila sa panganib gayong may mga paraan nang natukoy noon para sa unti-unting relokasyon (by batches) ng nakalistang mga pamilya sa mga proyektong pabahay ng pamahalaan.

 

“Bukod sa panganib ay hindi rin kami makapirmi sa aming paghahanapbuhay dahil sa iregularidad ng aming kalagayan kaya’t doble namang titinitiis ang hirap ng buhay at kawalang katiyakan sa paninirahan,” dagdag pa ni Estorosas.

 

Nakisaup sa NHA, sa provincial government, at maging sa Kongreso na magtulung-tulong na para maihakbang at ganap nang masolusyonan ang kanilang kahilingan.

 

At bilang bahagi ng uring manggagawa, ang PM at AMP ay sasabay din sa selebrasyon ng Mayo Uno sa Maynila sa darating na Lunes upang makilahok sa panawagang dadag na sahod, regular na trabaho, at karapatan ng manggagawa at maralita. 

PRESS RELEASE

Partido Manggagawa

Alyansa ng Maralitang Pilipino

28 April 2023

Contact:

Ver Estorosas

PM/AMP – Bulacan

09423690337