PM Suportado ang Panawagang ₱200 Dagdag-Sahod sa NCR

 

Suportado ng Partido Manggagawa (PM) ang petisyon ng Kapatiran ng mga Unyon at Samahang Manggagawa o Kapatiran para sa ₱200 dagdag sa arawang sahod ng mga manggagawa sa National Capital Region (NCR), kasabay ng panawagan sa Regional Tripartite Wages and Productivity Board na agarang aksyunan ito sa harap ng tumitinding krisis sa kabuhayan. 

 

Sa harap ito ng isinagawang public consultation ng NCR Regional Wage Board kaugnay ng mga petisyon sa dagdag sahod.

 

Ayon sa PM, ang hinihinging dagdag-sahod ay hindi luho kundi kinakailangang hakbang upang maibalik ang nawalang halaga ng sahod dahil sa mabilis na pagtaas ng presyo ng langis, pagkain, kuryente, at pamasahe bunsod ng kaguluhan sa Gitnang Silangan.

 

“Ang ₱200 wage hike ay hindi sobra. Ito ay pagbawi lamang sa nawalang halaga ng sahod ng manggagawa matapos ang sunud-sunod na taas-presyo. Nagkaputukan sa Middle East, nagtaasan ang presyo sa Pilipinas, pero ang minimum wage earners ay pinabayaang magtiis,” pahayag ni Renato Magtubo, chairperson ng Partido Manggagawa. 

 

“Under attack ang kabuhayan ng manggagawa kaya dapat mabilis ang tugon ng wage board. Kapag mabilis tumaas ang presyo, dapat mabilis din ang dagdag-sahod.”

 

Ipinaliwanag ng PM na ang kasalukuyang minimum wage na ₱695 sa NCR ay hindi na sapat upang tugunan ang araw-araw na gastusin ng isang pamilyang manggagawa. Batay sa consumer price index (CPI) ng NCR na nasa 131.2 noong Abril, bumagsak na sa humigit-kumulang ₱530 ang tunay na halaga ng minimum wage, katumbas ng mahigit ₱165 wage loss kada araw. Dagdag pa rito, tinatayang mahigit ₱1,200 kada araw ang kinakailangan ng isang pamilyang may limang miyembro upang mabuhay nang disente sa NCR.

 

Binigyang-diin din ng Partido Manggagawa na ang pagtaas ng sahod ay hindi lamang usapin ng social justice kundi isang makatuwirang patakarang pang-ekonomiya. Anila, ang mas mataas na kita ng manggagawa ay direktang napupunta sa konsumo tulad ng pagkain, transportasyon, edukasyon, at iba pang pangunahing pangangailangan, na nagpapalakas sa lokal na negosyo at ekonomiya. “Ang manggagawa ay hindi lamang producer kundi konsyumer din. Kapag may kakayahan silang gumastos, umiikot ang ekonomiya, lumalago ang negosyo, at dumarami ang trabaho,” ani Magtubo.

 

Sa huli, nanawagan ang Partido Manggagawa sa wage board na dinggin ang hinaing ng milyun-milyong manggagawa at ipagkaloob ang ₱200 dagdag-sahod bilang makatarungan at agarang tugon sa krisis sa kabuhayan. “Hindi limos ang hinihingi ng manggagawa. Ang hinihingi niya ay living wage na nakasaad mismo sa Konstitusyon—isang sahod na magbibigay dignidad sa kanyang buhay at sa kanyang pamilya,” pagtatapos ni Magtubo.

Photos at https://www.facebook.com/partidomanggagawa/posts/pfbid0M9Z9hJdzjb9koxNBL4jbFoGxFVHKHQBADZS5Qno4MfnxV6JgLK8g9d1J9q9EgB6pl

PRESS RELEASE

Partido Manggagawa 

22 May 2026